Hátíðir og viðburðir

Aðventuævintýri Aðventuævintýri á Akureyri hefst á laugardegi fyrstu aðventuhelgina fyrir jól, með því að ljósin er tendruð á jólatrénu á Ráðhústorgi, sem er gjöf frá Randers vinabæ Akureyrar í Danmörku. Aðventuvævintýri á Akureyri heldur svo áfram fram að jólum og rekur hver viðburðinn annan, ýmiskonar aðventu- og útgáfutónleikar, bókaupplestur, jólamarkaðir, miðbæjarstemmning, útijólaball og fleira sem fylgir því að njóta töfra aðventunnar.

Hátíðin var fyrst haldin árið 2002. Hátíðin stendur í 3 daga og er sett á fimmtudegi og lýkur á sunnudegi. Aðal viðburðurinn er keppni og sýning í gilinu (Kaupvangsstræti) á Akureyri á snjóbrettapalli þar sem 15 - 20 bestu iðkendur á Íslandi fá að spreyta sig. Einnig er boðið upp á keppni á Ráðhústorgi auk þess sem margir tónlistarviðburðir verða í bænum á vegum hátíðarinnar.

Akureyrarvaka er bæjarhátíð sem haldin er þann laugardag sem næst liggur afmæli Akureyrarbæjar, 29. ágúst. Hátíðin markar jafnframt lok Listasumars, listahátíðar sem stendur frá Jónsmessu til ágústloka.

Leikarnir voru fyrst haldnir 1976 og hafa verið árviss viðburður síðan og notið vaxandi hylli allra sem þar hafa komið nálægt, bæði barna og fullorðinna. Þetta er lang fjölmennasta skíðamót landsins, hátt í 1.000 keppendur á aldrinum 7-14 ára keppa í svigi og stórsvigi, göngu, bæði hefðbundinni og með frjálsri aðferð, að ógleymdri keppni í þrautabraut. Leikarnir eru haldnir í lok apríl.

Áramótin á Akureyri verða með hefðbundnu sniði nú sem endranær. Boðið verður upp á brennu við Réttarhvam, haldin eru böll og skemmtanir auk þess sem bæjarbúa taka þátt í hátíðarhöldunum með miklum myndarbrag með því að skjóta upp flugeldum um miðnætti.

Arctic Open er alþjóðlegt golfmót og hefur verið haldið frá árinu 1986. Mótið fer fram á Golfvelli Akureyrar að Jaðri og stendur í fjóra daga, þaraf eru tveir keppnisdagar. Mótið er það eina sinnar tegundar í heiminum, það er að segja spilað yfir hánótt að staðartíma. Golfvöllurinn að Jaðri er einnig nyrsti 18 holu golfvöllurinn í heimi. Mótið fer fram í lok júni ár hvert.

Bíladagar eru einn stærsti íþróttaviðburður sem haldin er á Íslandi og er einskonar árshátíð allra áhugamanna um bíla, hjóla og mótorsports almennt. Bílaklúbburinn býður upp á sér tjaldsvæði þessa daga fyrir gesti sína þar sem fólk getur fengið að gista á svæðinu og fengið gúmmífnykinn beint í æð alla dagana. Á svæðinu er einnig boðið upp á opnar æfingarbrautir fyrir alla gesti Bíladaga sem og Go-Kart leigu.

Árlegur viðburður í byrjun október sem stendur yfir eina helgi. Þar njóta vinkonur, systur, mæðgur, frænkur og vinnufélagar þess að gera eitthvað skemmtilegt saman. Hægt er að velja úr fjölda viðburða sem gleðja hjartað og verslanir og fyrirtæki bjóða mörg hver upp á ýmiskonar dömulega afslætti af þessu tilefni. Dömulegir dekurdagar voru fyrst haldnir árið 2008.

Árleg fjölskylduhátíð sem haldin er yfir Verslunarmannahelgina á Akureyri. Fjölbreytt úrval tónleika, skemmtikvöld fyrir alla fjölskylduna á Ráðhústorgi, viðburðir, uppákomur, tívolí o.fl. Hátíðin 2012 verður haldin 2. – 5. ágúst. Það eru Vinir Akureyrar sem standa að Einni með öllu í samvinnu við Akureyrarstofu.

Viðburðurinn hóf göngu sína árið 2007 og hefur verið haldinn árlega síðan. Á þessum degi opna um 18 söfn og sýningar við Eyjafjörð dyr sínar fyrir gestum og gangandi á fyrsta laugardeginum í maí undir heitinu Eyfirski safnadagurinn. Markmiðið er að vekja athygli á fjölda fróðlegra og forvitnilegra safna sem eru við Eyjafjörð. Enginn aðgangseyrir er að söfnunum á Eyfirska safnadeginum.

Árleg hátíð sem fer fram um miðjan júlí ár hvert og stendur yfir heila helgi. Boðið er upp á fjölskylduvæna dagskrá sem felst m.a. í óvissuferðum um eyjuna, skeljasúpu og sædýrasafni, söngvakeppni barna, ratleik, kvöldvöku, varðeld og söng. Ferðamálafélag Hríseyjar stendur að hátíðinni. Hátíðin 2012 verður haldin 13. - 15. júlí.

Flughelgi Flugsafns Íslands verður að venju haldin um Jónsmessuna. Þá verða ungar sem aldnar flugvélar dregnar fram í dagsljósið og sumar þeirra jafnvel teknar til kostanna. Hægt verður að kaupa kaffi og vöfflur á svæðinu eða fá sér pylsu með öllu. Þetta er kjörið tækifæri fyrir fjölskylduna til að gera sér glaðan dag og njóta óvenjulegrar skemmtunar um Jónsmessuna. Flugdagar 2012 verða haldnir 23. og 24. júní.

Áhugamannafélag sem stendur fyrir gönguferðum allt árið og skipuleggur gönguna "Glerárdalshringurinn 24x24 í júlí ár hvert.

Þessi viðburður var haldinn í fyrsta skipti árið 2011. Boðið er upp á fjölbreytta dagskrá byggða á grímseyskum hefðum og því hráefni sem árstíminn býður upp á. Grímseyingar standa alfarið að hátíðinni og taka vel á móti gestum. Þetta er líka tilvalinn tími til að skoða eyjuna, allar syllur og holur fullskipaðar af fugli, sólin farin að verma klappir og tún nánast allan sólarhringinn og lífríkið allt komið úr viðjum vetrar. Grímseyjardagurinn 2012 verður haldinn helgina 1. til 3.júní.

Göngugarpar og annað útivistarfólk kemst í skipulagðar gönguferðir um Eyjafjörð í nánast allt sumar. Ferðafélag Akureyrar og fleiri aðilar í firðinum bjóða upp á alls kyns forvitnilegar ferðir með leiðsögn. Allt frá léttum kvöldgöngum yfir í krefjandi fjallgöngu á við 24 tinda gönguna.

Árlega eru haldnir Hjóladagar á Akureyri sem fara fram upp úr miðjum júlí. Mótorhjólkúbburinn Tían stendur fyrir viðburðinum og er boðið upp á fjölbreytta dagskrá sem hentar öllu áhugafólki um vélhjól. Hjóladagar árið 2012 verða haldnir 19 - 22.júlí.

"Komdu norður" er markaðs- og kynningarátak sem hófst árið 2006 fyrir frumkæði nokkurra ferðaþjónustuaðila á Akureyri. Síðan þá hefur átakið dafnað og stækkað árlega og nær nú yfir stærra svæði og hefur fjöldi þátttakenda margfaldast. Veturinn 2011 til 2012 stefnir í metþátttöku með rýflega 130 fyrirtækjum á Akureyri og nærsveitum.

List án landamæra er haldin árlega og mætast þar fatlaðir og ófatlaðir í list sinni. Á hátíðinni er komið víða við í listinni s.s. í myndlist, tónlist og leiklist. Viðburðurinn fer fram í byrjun maí ár hvert.

Listasumar er fyrir löngu orðið að föstum lið í sumarflórunni á Akureyri og setur mikinn og hátíðlegan svip á bæinn. Hátíðin hefst á Jónsmessuleik í Kjarnaskógi.

Líf og starf fólks í Gásakaupstað miðalda er endurvakið á Miðaldadögum sem haldnir eru um miðjan júlí ár hvert. Kaupstaðurinn iðar af lífi og starfi miðaldafólks með fjölbreyttustu viðfangsefni. Iðnaðarmenn með brennisteinshreinsun, tré- og járnsmíðar, útskurð, leirgerð og viðgerðir á nytjahlutum. Bogar og örvar eru smíðaðir. Knattleikur er iðkaður af miklu kappi. Gestir kynnast vígfimum Sturlungum og vígamönnum í för erlendra kaupmanna og er fátt eitt upptalið.

Mótið er fyrir 5.flokk drengja og er stærsta árlega knattspyrnumót landsins með á fimmtánda hundrað þáttakendur auk þjálfara og liðsstjóra. Mótið er haldið um mánaðarmótin júní / júlí og stendur í 4 daga.

Páskaævintýri á Akureyri eru ógleymanleg upplifun. Hvort sem þú vilt fara á góða tónleika, renna þér á skíðum í Hlíðarfjalli, skella þér í eina albestu sundlaug landsins eða gera vel við þig og þína í mat og drykk - þá er Akureyri rétti staðurinn. Hér geturðu kynnt þér allt það helsta sem um er að vera yfir páskahátíðina 29.-9. apríl 2012

Árlegur viðburður sem fer fram í byrjun júlí. Mótið hefst á föstudagsmorgni og lýkur með lokahófi á laugardagskvöldinu. Á þessu móti taka þátt kempur kvenna og karla í eldri kantinum sem rifja upp gamla takta. Mótið fer fram á Íþróttasvæði þórs við Hamar.

Hefð er fyrir því að halda upp á Sjómannadaginn á Akureyri með hátíðlegri dagskrá yfir heila helgi. Settur er krans við minnismerki sjómanna, guðþjónusta helguð sjómönnum er haldin í kirkjum bæjarins og á dagskrá er yfirleitt fjölskylduhátið að Hörmum auk þess sem sjómenn setja upp dagskrá með siglingum og viðburðum á og við Pollinn.

Vetrarfrí á Akureyri eru ógleymanleg upplifun. Hvort sem þú vilt fara á góða tónleika, renna þér á skíðum í Hlíðarfjalli, skella þér í eina albestu sundlaug landsins eða gera vel við þig og þína í mat og drykk - þá er Akureyri rétti staðurinn. Hér geturðu kynnt þér allt það helsta sem um er að vera þegar vetrarfrí eru í mörgum grunnskólum landsins.

Éljagangur er vetrar- og útivistarhátíð á Akureyri, haldin í byrjun febrúar ár hvert. Hátíðin 2013 verður haldin 7.-10. febrúar. Fastir liðir á hátíðinni eru Vetrarsportsýning EY-LÍV sem verður haldin helgina 9.-10. febrúar, sleðaspyrna og íscrosskeppni auk fjölda annarra viðburða.

Þjóðhátíðardagurinn 17. júní skipar háan sess í hugum Akureyringa sem og allra landsmanna. Mikið er um dýrðir í bænum og hefst hátíðardagskrá klukkan 13 í Lystigarðinum. Þaðan er farið í skrúðgöngu niður í miðbæ þar sem boðið er upp á fjölskylduskemmtun um daginn og svo aftur um kvöldið og fram að miðnætti. Dagskrá lýkur með marseringu nýstúdenta Menntaskólans á Akureyri á torginu um miðnætti.