Viðburður

Karl Guðmundsson, Rósa Kristín Júlíusdóttir og Arna Valsdóttir opna sýninguna Samleikur í Mjólkurbúðinni Sal Myndlistafélagsins föstudaginn 30.ágúst kl. 14.00. Þau sýna verk sem Kalli málar á ógrunnaðan grófan striga og Rósa saumar í með ullargarni og vídeóverk eftir Önru sem byggir á samspili hinna tveggja.
Sýningin opnar á Akureyrarvöku föstudaginn 30. ágúst kl. 14.00 og lýkur sunnudaginn 8. september. Opnunartími 13 – 17.

Picasso sagði að það væri nauðsynlegt að varðveita barnið í sjálfum sér. Frá árinu 2000 höfum við Kalli og Rósa “leikið” okkur saman með línur og spor. Á þessum árum hefur margskonar þróun átt sér stað í “samleik” okkar. Myndrænn samleikur okkar byggir á samspili líkt og í tónlist; samspili listamanna, tveggja vina. En einnig samspili listamannsins við efniviðinn þar sem listaverkið er afraksturs samleiks, líkt og í sónötu þar sem hljóðfærin skiptast á, skynrænn samleikur (dialogue) milli efnisins og þeirra sem skapa verkið.

Línur hafa lengi verið uppistaðan í myndverkum Kalla, hann kallast á við línurnar sínar, spyr þær spurninga og krefur þær svara. Þannig getur einföld lína falið í sér óteljandi tjáningarmöguleika. Undanfarin ár hefur Kalli unnið að því að láta línurnar mynda hringform. Í samleik okkar höfum við tekist á við þetta verkefni. Þrátt fyrir að línur Kalla svari honum stundum með því að fara eigin leiðir, þá hefur honum með ásetningi tekist að láta þær mynda ýmiskonar hringform sem eru uppistaðan í verkunum sem eru afrakstur samleiks okkar.

Samvinna, eða samleikur, okkar hefur þróast í þá átt að við kynnum hugmyndir okkar fyrir hvort öðru alveg frá byrjun, þá tekur við bæði sjónrænt og orðað samtal sem heldur áfram allt sköpunarferlið og fram að hinu endanlega sköpunarverki. Í samvinnu listsköpun, samleik okkar tökum við stöðugt mið af fjölbreytileikanum í listsköpun, sjónræn, orðuð og verkleg vinnuferli öðlast líf með sköpun og rannsóknum.

Verkefnið þróaðist í samtali mynda og orða þar sem hvort okkar hafði sína eigin rödd, en raddirnar runnu svo saman í eina með samleik okkar. Listsköpunin tilheyrir okkur báðum jafnt, hvort sem litið er til hugmyndafræði hennar eða sjálfrar sköpunarinnar, þar sem hún byggist á ákveðnu samtali sem leiðir okkur að sameiginlegu markmiði.

Fyrir allnokkru siðan tókum við þá ákvörðun að bjóða Örnu G. Valsdóttur videolistamanni til okkar til þess að skrásetja með myndbandstökum þennan samleik/listræna samtal okkar. Þar með varð hún hluti af samleiknum og sýnir nú í fyrsta sinn með okkur brot úr þeim tökum sem hún hefur safnað.

* Enginn aðgangseyrir

Sjáumst á Akureyrarvöku!
Skoðaðu fleiri skemmtilega viðburði á www.akureyrarvaka.is

#akureyrarvaka #akureyri #hallóakureyri