Vændi hefur til skamms tíma ekki farið hátt í umræðunni enda hefur því alltaf fylgt skömm og launung. Brotaþolar vændis glíma við flóknar og alvarlegar afleiðingar vændisins, skelfilegar minningar og lífsreynslu sem erfitt getur verið að lifa með. Vændiskaup eru ólögleg hérlendis og teljast kynferðisbrot samkvæmt íslenskum lögum.

Samkvæmt lögreglunni og brotaþolum vændis er eftirspurnin eftir vændi þó gríðarleg hér á landi. Það er því mikilvægt að tala opinskátt um vændi, bæði á samfélagslegum grundvelli, og ekki síður hvernig má koma til móts við brotaþola vændis af skilningi og mannúð.