Heimildamynd: Frá ómi til hljóms — tónlistin á dögum Sveins Þórarinssonar amtskrifara
Heimildamynd um íslenskt tónlistarlíf á 19. öld.
Á fullveldisdaginn, sem einnig er dagur íslenskrar tónlistar, verður „Frá ómi til hljóms“ sýnd á sýningunni Tónlistarbærinn Akureyri í Minjasafninu á Akureyri. Sýningin hefst klukkan 17:00 og mun höfundur myndarinnar og framleiðandi, Ásdís Thoroddsen, sitja fyrir svörum að sýningu lokinni.
Heimildakvikmyndin fjallar um breytingar, sem urðu í íslensku tónlistarlífi á 19. öld. Leiðarstefið mynda þær dagbókarfærslur Sveins Þórarinssonar amtskrifara á Möðruvöllum (1821-1868) sem lúta á tónlist, en hann hélt dagbækur frá unglingsaldri þar til hann lést.
Tónlistariðkun íslenskrar alþýðu hafði helst verið rímnasöngur, grallarasöngur, þulur og tvísöngslög. Annar fjölraddaður söngur þekktist ekki. Oft var sungið í fornum kirkjutóntegundum, svo sem lýdíska skalanum. Einu hljóðfærin, sem almenningur hafði aðgang að, voru langspilið og íslenska fiðlan. Þá gerðist það fyrir miðja 19. öld, að ákveðið var að bæta þyrfti kirkjusönginn í Dómkirkjunni og urðu þær lagfæringar upphafið að umsnúningi á íslensku tónlistarlífi, sem ruddi braut „hinum nýja söng“, en svo var hinn fjölradda söngur í dúr og moll kallaður, sem barst frá meginlandinu. Alþýðan tók þó líka frumkvæði, ekki síst á Norðurlandi eystra um miðja öldina, þegar fiðlur, flautur og nótnahefti voru flutt inn og fiðlueign þar í sveitum varð með eindæmum.
Hvar: Minjasafnið á Akureyri - Aðalstræti 58 Akureyri
Hvenær: 1. desember kl. 17
Aðgangur ókeypis.