Söguslóð Akureyrar

Gengið um helstu sögustaði og segla bæjarins (bláa leiðin í Akureyri Guide bæklingnum).

Gangan hefst á Ráðhústorgi og þaðan er gengið til suðurs í gegnum miðbæinn. Staldrað er við Kaupvangstorg þar sem Akureyrarkirkja og Listagilið /Kaupvangsstrætið blasa við. Áfram er haldið í átt að innbænum. Á leiðinni sést til Sigurhæða þar sem þjóðskáldið Matthías Jochumsson bjó og einnig Samkomuhúsið/leikhúsið og söguskiltið sem þar er, þarna má stytta gönguna og ganga upp menntastíginn ef ekki er tími fyrir langa göngu (athugið þó að stígurinn er brattur og getur verið háll á veturna).

Gengið er áfram að gatnamótum Hafnarstrætis og Aðalstrætis. Þar standa nokkur tilkomumikil hús m.a. tvö stór falleg timburhús Höefner og Tuliniusarhús. Sunnan við gatnamótin er söguskilti sem sýnir og segir sögu gömlu Akureyri (sjá hér). 

Hægt er að gæða sér á ís í Brynju áður en haldið er áfram að Laxdalshúsi og fleiri merkum húsum eins og Gamla Spítala, Friðbjarnarhúsi og Nonnahúsi.

Við Minjafnið/Minjasafnskirkjuna/Nonnahús er haldið á brattann - upp Nonnastíginn sem liggur upp brekkuna norðan við Minjasafnið og upp á hæðina. Þar er gengið inn í kirkjugarðinn og gegnum hann til hægri/norðurs.  Staldrað er við útsýnisstaðinn við Höfðakapellu, þar sem einnig er hægt að hvíla sig á bekk og/eða lesa skiltið um Nonna (Jón Sveinsson) áður en áfram er haldið niður stíginn sem endar í Lækjargilinu.

Þegar komið er niður í Lækjargilið er haldið til hægri og síðan farið til vinstri upp Spítalaveginn. Veginum er fylgt þangað til að komið er að Lystigarðinum. Garðurinn skoðaður og síðan haldið niður Eyrarlandsveginn fram hjá Menntaskólanum á Akureyri, Péturskirkju og styttunni af Útlaganum.  Áfram niður Eyrarlandsveginn að Akureyrarkirkju og niður kirkjutröppurnar niður í miðbæinn og áfram inn að Ráðhústorgi þar sem hringnum er lokið. 

Hér má sækja GPX skrá fyrir leiðina.

Hér má sjá upphafsstað leiðarinnar.