Gamla Gróðrarstöðin

Frá Skautahöllinni er gengið yfir Miðhúsabraut og meðfram henni upp að hitaveitulögninni. Þaðan er stefnan tekin í suður meðfram hitaveiturörunum. Á vinstri hönd er skógarreiturinn við gömlu Gróðrarstöðina og matjurtagarðar bæjarins. Þegar komið er suður að Galtalæk, þar sem vegur þverar gönguleiðina er haldið til vinstri niður veginn og að þjóveginum.

Gengið er yfir þjóðveginn (gætið að umferð) og yfir á Drottningarbrautarstíginn og honum fylgt til norðurs að gatnamótunum við Mótorhjólasafnið. Þar er aftur gengið yfir þjóðveginn (gætið að umferð) og að gömlu Gróðrarstöðinni, á sumrin er gaman að leggja auka krók á leiðina og ganga um skógarreitinn sem þarna er. Frá gömlu Gróðrastöðinni er gengið til norðurs, framhjá Iðnaðarsafninu og í átt að Skautahöllinni þar sem hringnum er lokið.

Gamla Gróðrarstöðin og Gróðrarstöðvarreiturinn á Krókeyri

Á Krókeyri, einni af eyrunum undir Akureyrarbrekkunum, stendur Gamla Gróðrarstöðin, merkilegt timburhús frá upphafi 20. aldar. Húsið var reist árið 1905–1906 af Ræktunarfélagi Norðurlands, sem var stofnað árið 1903. Markmið félagsins var að efla trjárækt, garðyrkju og landbúnað á Norðurlandi á tímum þegar slíkar hugmyndir voru enn nýjar og mörgum þótti óvíst hvort skógrækt gæti dafnað á Íslandi.

Gamla Gróðrarstöðin var byggð sem fjölnota hús. Þar voru m.a. tilraunastofa, skrifstofa, kennslustofa, frægeymsla, íbúð fyrir starfsmenn og svefnpláss fyrir nemendur. Húsið var því bæði rannsóknarstöð, skóli og heimili þeirra sem unnu að tilraunum með plöntur og ræktun. Þar fóru einnig fram námskeið fyrir bændur og kennsla.

Húsið sjálft er tvílyft timburhús á háum kjallara með risi, járnklætt með skreyttum sperruendum sem minna á svonefnd sveitser- eða katalóghús, sem voru vinsæl á þessum tíma og oft byggð eftir norskum fyrirmyndum. Þrátt fyrir aldur sinn hefur húsið varðveist vel og var endurnýjað á fyrstu árum 21. aldar.

Í kringum húsið er Gróðrarstöðvarreiturinn, þar voru ræktaðar ýmsar tegundir plantna og kennd garðyrkja. Með tímanum varð svæðið að gróskumiklum skógarreit sem í dag er rólegur og fallegur útivistarstaður.

Í dag er Gróðrarstöðvarreiturinn eins konar falinn grænn unaðsreitur í sunnanverðum Innbæ Akureyrar. Trén, stígarnir og gamla húsið mynda sérstaka heild og minna á upphaf skógræktar og garðyrkju á Eyjafjarðarsvæðinu. Saga svæðisins spannar nú meira en 120 ár og tengist beint þeirri miklu ræktunarvakningu sem átti sér stað á Íslandi í byrjun 20. aldar.

Gamla Gróðrarstöðin er því ekki aðeins fallegt og sögulegt hús heldur einnig mikilvægur minnisvarði um upphaf skipulegrar trjáræktar og garðyrkju á Norðurlandi.