Glerá og garðar

Þetta er þægileg gönguleið sem liggur um malbikaða stíga um rólegar götur, fram hjá Glerártorgi, meðfram Gleránni og um dálítið falda göngustíga um rótgróin hverfi bæjarins.

Gangan hefst við Ráðhústorg og er gengið upp Brekkugötuna, fram hjá Amtsbókasafninu og að klöppunum þar sem styttan af Helga magra og Þórunni hyrnu stendur, en þau námu land hér í Eyjafirði.

Þaðan er gengið niður að verslunarmiðstöðinni Glerártorgi og áfram að ánni Glerá sem verslunarmiðstöðin dregur nafnið sitt af. Gengið er yfir ánna og beygt til vinstri og haldið upp eftir göngustígnum sem liggur meðfram Gleránni. Á leiðinni er komið að Bandagerðisbrú sem var fyrsta akfæra brúin yfir Glerá, byggð árið 1922, og um hana lá þjóðvegurinn út frá Akureyri. Brúin er í dag nýtt sem göngu og hjólabrú. Ofan við brúna má sjá Glerárvirkjun, hún framleiðir um 290kW af raforku. Ekki er farið yfir brúnna heldur haldið áfram upp með ánni en hægt er að velja um tvær leiðir. Halda áfram eftir malbikuðum stígnum og áfram meðfram götunni eða fara niður malar-/moldargötu niður í gilið að virkjuninni og upp steyptar tröppur. Sama hvor leiðin er valin þá liggur áframhaldið yfir rauðu stálgrindarbrúna sem er þarna ofan við gilið.

Fróðleiksmolar
Glerá á upptök sín í fjalllendinu innst í Glerárdal, þaðan sem hún rennur um 19 km leið um Glerárdal og loks 3 km í gegnum Akureyri þar til hún fellur til sjávar í innarlega í Eyjafirði. Áin ber einkenni dragár, lindár og jökulár og fer það eftir árstíma og veðurfari hvernig samsetning hennar er. Í leysingum á vorin og miklum rigningum er áin brún á lit þar sem hún ber með sér mikinn jarðveg og á sumrin er jökulvatn áberandi og þá einkennist litur árinnar af gráum jökulleir. Á veturna er rennslið hinsvegar minnst og er áin þá jafnframt tær. Glerá getur þannig verið æði misjöfn ásýndum innan þéttbýlisins, allt eftir veðri og árstíðum.
Fróðleiksmolar um fyrstu brýr yfir Gleránna https://www.herak.is/is/frettir/um-fyrstu-bryr-a-glera

Þegar yfir brúna er komið er stígnum fylgt beint áfram, farið í gegnum undirgöngin við Borgarbrautina og stefnt á Íslandsklukkuna sem stendur uppi á klettahrygg við bílastæði Háskólans á Akureyri. Stígnum er fylgt áfram meðfram bílastæðunum á milli háskólans og Borga, upp hlíðina fram hjá hjólabrettagarðinum og upp í Gerðahverfið. Við Stóragerði er beygt til vinstri og göngustígnum fylgt alla leið niður að Byggðavegi. Þar er beygt til hægri inn á stíg sem liggur í gegnum garðinn Hamarskotstún (á bakvið lítið hús sem stendur á horninu. Gengið er í gegnum garðinn, að Þingvallarstræti. Við gatnamótin er haldið til vinstri fram hjá Sundlaug Akureyrar, andapollinum og niður kirkjutröppurnar hjá Akureyrarkirkju og síðan beygt inn á Hafnarstræti (inn í miðbæ) og aftur að Ráðhústorgi þar sem göngunni líkur.