Akureyrarveikin var skæður sjúkdómur sem herjaði á Akureyringa og fjölmarga aðra um allt land veturinn 1948 til 1949. Veikin stakk sér aftur niður sex árum síðar, veturinn 1955-1956, á Vestfjörðum og í Þistilfirði. Aldrei hefur verið upplýst hvers konar veikindi þetta voru en allt bendir til þess að um hafi verið að ræða veirusýkingu af einhverjum toga.

Það hefur komið í ljós að sláandi líkindi eru með afleiðingum Akureyrarveikinnar og langvarandi eftirköstum COVID 19 og ME-sjúkdómnum. Þetta kemur skýrt fram í bók Óskars Þórs Halldórssonar um Akureyrarveikina sem kom út á síðasta ári og hefur vakið mikla athygli. Til einföldunar má segja að Akureyrarveikin hafi verið ME-sjúkdómur þess tíma.

Friðbjörn Sigurðsson læknir við Akureyrarklíníkina, sem er þjónustumiðstöð fyrir fólk með ME-súkdóminn eða langvarandi einkenni COVID, þekkir vel einkenni ME-sjúkdómsins og hversu útbreiddur hann er í okkar samfélagi á Íslandi og út um allan heim.

Óskar Þór og Friðbjörn munu í fyrirlestri sínum tefla saman fortíð og nútíð og velta upp ýmsu er tengir Akureyrarveikina og ME-sjúkdóminn.

Fyrirlesturinn er í Minjasafninu á Akureyri kl. 17.00.
Aðgangur er ókeypis.

Næstu viðburðir:

• 19. febrúar – Spegill þjóðar - fréttamyndir í 50 ár og sagan á bakvið þær; Gunnar V. Andrésson og Sigmundur Ernir Rúnarsson.

• 5. mars – Ilmur, angan og fnykur: Ýmis lykt í íslenskum heimildum frá 19. og 20. öld; Ragnhildur Björt Björnsdóttir, sagnfræðingur.

• 12. mars – Strá fyrir straumi. Ævi Sigríðar Pálsdóttur (1809–1871) og brotakenndar heimildir; dr. Erla Hulda Halldórsdóttir.

• 19. mars – Skreytingar í handritum síðari alda og þáttur af einum norðlenskum listaskrifara; Kjartan Ísleifsson, sagnfræðingur.