Bergmál umbreytingar: Út í garð
Charlotte Søeborg Ohlsen (f. 1970) er danskur myndlistarmaður og hönnuður sem lauk námi í grafískri hönnun frá Konunglegu listaakademíunni í Kaupmannahöfn. Í verkum sínum rannsakar hún mörk myndlistar, hönnunar og handverks og þar gegnir pappír lykilhlutverki, bæði sem efniviður og aðferð. Á undanförnum árum hefur hún þróað listaverk í málmi og unnið staðbundnar innsetningar þar sem náttúra, arkitektúr og umhverfi verða virkir þátttakendur í merkingarmyndun verkanna.
Listsköpun Charlotte einkennist af nákvæmri efnismeðferð og rannsókn á umbreytingu. Hvert verk sprettur úr einni örk sem er klippt og brotin án líms þannig að einfaldur flötur verður að margbrotnu formi. Skordýr eru leiðarstef í verkum hennar og vísa jafnt til viðkvæms jafnvægis vistkerfa sem sífelldra hringrása vaxtar, umbreytingar og hnignunar. Þegar þessi form eru yfirfærð í messing eða ál heldur umbreytingin áfram, því yfirborð málmsins tekur smám saman breytingum undir áhrifum loftslags og tíma.
Sýningin Bergmál umbreytingar: Út í garð er staðbundin innsetning sem spannar tvö ólík rými: Listasafnið á Akureyri og Lystigarð Akureyrar. Hún er hugsuð sem eitt samfellt verk sem leiðir áhorfandann frá innra rými safnsins og út í stóran garðinn. Í safninu birtast skordýr úr svörtum pappír sem virðast hafa numið staðar á gluggum, veggjum og í rýminu sjálfu. Í Lystigarðinum taka sams konar form á sig nýja mynd sem skúlptúrar úr messingi og áli, þar sem náttúran verður virkur þátttakandi í þróun verkanna og þau eru á víð og dreif. Veður, birta og árstíðir móta yfirborð málmsins og gera tímann að sýnilegu efni. Þannig verður ferð áhorfandans milli safns og garðs hluti af verkinu sjálfu, þar sem mörk milli byggingar og landslags, náttúru og menningar, hins brothætta og hins varanlega verða óljós.