Björn Heimir Önundarson, fæddur árið 1996, er listamaður sem starfar í Reykjavík á sviði málverka, myndasagna, teikninga og teiknimynda. Hann útskrifaðist af teiknibraut úr Myndlistaskóla Reykjavíkur árið 2018, stundaði svo animation-nám í Willem de Kooning Academy og stundar nú nám við myndlist í LHÍ. Í verkum sínum notast hann einna helst við narratífu og frásögn sem má rekja til ástar hans
á teiknimyndum og teiknimyndasögum. Hann dregur ma.a innblástur frá
skopmyndateiknurum á borð við Robert Crumb og Ralph Bakshi, og málurum eins og Philip Guston, Chaim Soutine og Otto Dix. Afbökun og fáránleiki eru hans helstu tól til að snúa upp á veruleikann og draga þannig fram hina sönnu óreiðu mannskepnunnar og sturlun heimsins. Verkin hans eru orkumikil, litrík og óstýrilát. Allt er á stöðugri hreyfingu og ekkert er nokkurn tíma alveg í jafnvægi.

----------------
Viðburðurinn er hluti af listasumri 2026

 

Kaktus er styrktur af SSNE, Myndlistarsjóði, Menningarsjóði Akureyrar og KEA