Upptaktstónar Akureyrarvöku í Hofi hljóma á föstudagskvöld í Hömrum kl. 22 þegar Slagverksdúóið Puruñeka Duo spilar taktfasta og leikandi tónlist inní helgina fyrir gesti og gangandi.

Dagskráin á laugardaginn hefst kl. 13.15 Í Hamragili og lýkur með uppistandi Heimamanna sem hefst kl. 21. Tónlistarmaðurinn Jón Jónsson stígur fyrstur á stokk af sinni alkunnu snilld, Leikfélag Akureyrar býður Akureyringum og gestum þeirra uppá opna æfingu í Hamraborg á fjölskylduleikritinu Skilaboðaskjóðunni, auk þess að taka senu úr Fasteignamartröðinni og bruna á ógnarhraða yfir 120 ára sögu Samkomuhússins til upphitunar fyrir stórafmæli þess. Sinfóníuhljómsveit Norðurlands býður þessu næst heim og flytur hið sígilda og vinsæla fjölskylduævintýri Pétur og úlfinn í Hamraborg.

Kalli Örvars verður með ör-uppistand ásamt fjöldasöng í Hömrum og sveitatónlist mun í kjölfarið óma um húsið í flutningi tríósins Flökkuhjarta. Sópranrödd Mahaut og sellóundirleikur Steinunnar Arnbjargar gæða vel kunnum sönglögum nýja vídd þeim sem á hlýða og litríkir tónar Lúðrasveitar Akureyrar þjóta hressandi um æðar ungra sem aldna. DJ Ívar heldur uppi afmælispartýtónum á útisvæði Majó þar til Heimamenn mæta til leiks með ferskt uppistand og persónulegar pælingar.

Kista verður með aðlaðandi tilboð í tilefni Akureyrarvöku og Majó tekur þátt með girnilegum og öflugum hætti, enda fagnar staðurinn fimm ára afmæli.

Hér fyrir neðan má sjá nánari upplýsingar um hvern dagskrárlið okkar á Akureyrarvöku, allir viðburðir eru án endurgjalds.

Hlökkum til að sjá ykkur öll í Hofi.

Nánari upplýsingar um hvern einasta viðburð má finna á viðburðarsíðu www.mak.is