Rán Flygenring les í fyrsta skipti upp úr glænýju bókinni sinni BLÖKU sem kemur út í október.

Um Blöku:

"Hún skýst fram hjá okkur í myrkrinu, fim eins og fimleikastelpa, ör eins og orrustuþota. Stórhættuleg. Æsispennandi."

Í svartasta skammdeginu undirbúa Vaka, Kókos og pabbi sig fyrir sólarlandaferð. Þau ætla að heimsækja vatnsrennibrautagarð, taka þátt í sandkastalakeppni og belgja sig út af ís. En þegar þau koma auga á rammvillta leðurblöku flögrandi í húminu grípur um sig skelfing í borginni og áform þeirra fljúga út í veður og vind. Óhrædd við myrkrið tekur Vaka afdrifaríka ákvörðun sem snýr veröldinni á hvolf."

Upplesturinn hentar fólki á öllum aldri, en þar sem sagan er að sumra mati örlítið hryllileg er góð hugmynd fyrir börn að mæta með foreldrum sínum.
Einnig verður í boði einfaldur teningateiknileikur fyrir þau handóðu og hugmyndaríku.

Við hvetjum ykkur til að mæta með umhverfisvænum hætti á viðburðinn. Frítt er í strætó og allir strætisvagnar stoppa í miðbænum í 300 metra fjarlægð frá safninu.