Svanasöngur eftir leikskáldið Anton Tsjekhov fjallar um 68 ára gamlan leikara, Vasílí, sem vaknar einn og yfirgefinn í tómu leikhúsi eftir sýningu sem var haldin honum til heiðurs. Í tómleika leikhússins lítur hann yfir farinn veg og ræðir við ungan sviðsmann, Nikíta, um einsemdina, ellina og fórnirnar sem fylgja lífinu á sviðinu. Samtal þeirra sveiflast á milli gleði og örvæntingar sem kristallar skammtímaeðli frægðarinnar.
Feðgarnir Arnór Benónýsson og Benóný Arnórsson fara með hlutverkin tvö, en verkið er unnið með tengsl þeirra í huga og hvernig kynslóðaskipti eru að eiga sér stað í leikhúsinu. Býr sviðsmaðurinn ungi yfir leyndum hæfileikum? Hvernig tekst Vasilí á við það að vera að eldast og að aðrir stígi inn í sviðsljósið? Er hann tilbúinn að sleppa tökunum á leikhúsinu?