Kortérslangir tónleikar á Listasafninu á Akureyri
laugardaginn 6. desember
kl. 15,
endurteknir klukkan 16.

Aðgangur er ókeypis, aðgengi gott og öll velkomin!

 

Jón Þorsteinn Reynisson mun í aðventuhúminu, fyrir milligöngu harmoniku sinnar, leiða okkur um tónlistarheim Sofiu Gubaidulinu. Hún er eitt mesta tónskáld harmonikutónlistar fyrr og síðar. Gubaidulina fæddist árið 1931 en lést í mars síðastliðnum.

 

Því er við hæfi að heiðra minningu hennar með því að gefa henni lokaorðið á TÓLF TÓNA KORTÉRINU í ár. Jón Þorsteinn leggur einnig tónsmíðaorð í belg með frumflutningi nýs tónverks eftir sjálfan sig. Önnur eins efnisskrá dugir til að halda hvaða grýlu, hrekkjalóm eða jólaketti sem er fjarri okkur í aðdraganda jóla. Missið ekki af þessum einstöku aðventutónleikum!

 

Aðgangur að safninu er ókeypis meðan á TÓLF JÓLA-TÓNA KORTÉRINU stendur. Það er unun að hlusta saman á tónlist í kortér og skoða svo sýningar safnsins. Jafnvel með viðkomu á Ketilkaffi, ef hungur eða þorsti sverfa að.

 

Börn, öldungar og öll þar á milli eru velkomin á tónleikana.

 

Efnisskrá:
Fachwerk - S. Gubaidulina
De profundis - S. Gubaidulina
Nýtt tónverk ónefnt enn - Jón Þorsteinn Reynisson

 

TÓLF TÓNA KORTÉRIÐ þakkar Sóknaráætlun Norðurlands Eystra, Akureyrarbæ, Tónskáldasjóði RÚV/STEFs og Menningarsjóði FÍH stuðninginn á árinu sem er að líða.