Á slóð Helga magra og Þórunnar hyrnu

Leiðin byrjar á Ráðhústorgi og þaðan er gengið upp Brekkugötuna, framhjá Amtsbókasafninu og upp að hringtorginu efst í götunni, þar sem beygt er til hægri út á klappirnar.  Á klöppunum má sjá styttuna af Helga magra og Þórunni hyrnu. Þaðan er síðan haldið suður eftir Helgamagrastræti, fram hjá leikskólanum Hólmasól. Leikskólinn Hólmasól stendur á milli Þórunnarstrætis (hyrnu) og Helgamagrastrætis en Hólmasól var dóttir Helga og Þórunnar. Leikskólinn starfar undir merkjum Hjallarstefnunnar.

Helgamagrastræti er gengið suður að gatnamótunum við Þingvallarstræti. Þar er beygt til hægri upp að gatnamótum og beygt inn á Þórunnarstræti og haldið sem leið liggur til suðurs meðfram Sundlaug Akureyrar og yfir gatnamótin hjá Hrafnagilsstræti og að innkeyrslunni að heimavistinni að MA og VMA (Eddu hótelinu). Farið er inn á bílastæðið og að innganginum að Lystigarðinum. 

Gengið er um garðinn og síðan niður á Eyrarlandsveginn, þar er haldið til vinstri (norðurs), fram hjá Péturskirkju, niður að Akureyrarkirkju og áfram niður kirkjutröppurnar niður í miðbæinn og að upphafspunkti göngunnar við Ráðhústorg.

Um Helga magra og Þórunni hyrnu
Um 900 árum eftir Kristsburð tóku norrænir víkingar að leggja leið sína til Íslands, eða svo segir í Landnámabók þar sem greint er frá landnámi Íslands. Einn þeirra var Helgi magri. Hann var fæddur á Írlandi, sonur írskrar konungsdóttur en faðir hans var af norrænum ættum. Þegar Helgi var barn komu foreldrar hans honum í fóstur á Suðureyjum en er þau komu að sækja hann hafði hann verið sveltur svo mjög að þau þekktu hann ekki. Fékk hann þá viðurnefnið magri.

Trúmál Helga voru nokkuð sérstæð. Hann trúði á Krist en til sjóferða og þegar mikið lá við hét hann á Ása-Þór og það var hann sem vísaði Helga magra til Íslands.

Kona Helga magra hét Þórunn hyrna. Sagan segir að þau hafi siglt norður fyrir Ísland árið 890, inn á Eyjafjörð og tekið land á Árskógsströnd vestan fjarðarins. Þar höfðu þau vetursetu en fluttu árið eftir inn að Bíldsá hinu megin við fjörðinn.
Þau ákváðu síðan að setjast að til frambúðar enn innar í firðinum, á Kristnesi. Á leiðinni þangað, á hólma í Eyjafjarðará, fæddi Þórunn hyrna barn. Þar var kominn fyrsti Eyfirðingurinn, Þorbjörg hólmasól.  Heimild: www.eyjafjordur.is